កំពង់ស្ពឺ៖ បុរសម្នាក់បានស្លាប់បាត់បង់ជីវិតក្នុងហេតុការណ៍គ្រោះថ្នាក់ចរាចរណ៍មួយដែលបណ្ដាលមកពីរថយន្តបីគ្រឿងបុកតគ្នានៅលើផ្លូវជាតិលេខ៤ ក្នុងខេត្តកំពង់ស្ពឺ។

សមត្ថកិច្ចឱ្យដឹងថា ហេតុការណ៍គ្រោះថ្នាក់នេះកើតឡើងក្នុងភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ មានករណីគ្រោះថ្នាក់ចរាចរណ៍រវាងរថយន្ត២គ្រឿង ដែលបើកបុកបញ្ច្រាសទិសគ្នា ហើយមានរថយន្តមួយគ្រឿងទៀតបុកបន្តពីក្រោយដែលបណ្ដាលឱ្យមនុស្សម្នាក់ស្លាប់បាត់បង់ជីវិត។

តាមរបាយការណ៍សមត្ថកិច្ចនគរបាលចរាចរណ៍បានឲ្យដឹងថា រថយន្តទី១ម៉ាក Sterling ពណ៌ស ពាក់ស្លាកលេខ ភ្នំពេញ 3D-0716 សណ្តោងរ៉ឺម៉ក ពាក់ស្លាកលេខ ភ្នំពេញ 4A-8954 បើកបរមិនស្គាល់ឈ្មោះ ធ្វើដំណើរក្នុងទិសដៅពីលិចទៅកើតបានរេចង្កូត ទៅខាងឆ្វេងដៃទៅបុករថយន្តមួយគ្រឿងម៉ាក FREIGHTNER ពាក់ស្លាកលេខ ភ្នំពេញ 3A-1278 សណ្តោងរ៉ឺម៉ក ពាក់ស្លាកលេខ ព្រះសីហនុ 4A-1651 ដែលកំពុងធ្វើដំណើរបញ្ច្រាសទិសគ្នា។ ស្របពេលនោះដែរ មានរថយន្តមួយគ្រឿងទៀតម៉ាក HungHe ពណ៌ស ពាក់ស្លាកលេខ ភ្នំពេញ ក-4823 ភព3 សណ្តោងរ៉ឺម៉ក ពាក់ស្លាកលេខ ភ្នំពេញ 4A-7879បើក មកពីទិសខាងកើតទៅលិចបានជ្រុលទៅបុកបន្ថែមពីក្រោយ។ 

ក្នុងហេតុការណ៍នេះបណ្តាលឲ្យស្លាប់មនុស្ស១នាក់ ខូចខាតរថយន្ត ៣គ្រឿងធ្ងន់ធ្ងរ។ បន្ទាប់ពីធ្វើការវាស់វែង និងកំណត់ហេតុរួចសមត្ថកិច្ចបានប្រគល់សាកសពជនរងគ្រោះជូនគ្រួសារយកទៅធ្វើបុណ្យតាមប្រពៃណី។ ចំណែកវត្ថតាង នាំយកទៅរក្សាទុកនៅអធិការដ្ឋានស្រុកភ្នំស្រួច ដើម្បីចាត់ការតាមនីតិវិធី៕

^{រូបថត: អគ្គស្នងការដ្ឋាននគរបាលជាតិ}